ഒരു കുഞ്ഞുനോവ്

കപ്പിലെ ഉണര്‍വിലേക്ക്

ഊളയിടുമ്പോള്‍ ഓര്‍ത്തില്ല,

പച്ചപുതപ്പു വാരി പുതച്ച

മലനിരകളെ ,

കിളുന്തുഇലകള്‍ പറിച്ചെടുത്ത

തഴബിനെ ,

ഉണക്കി പൊടിച്ചു ഇപ്പരുവമാക്കിയ

കൂറ്റന്‍യന്ത്രത്തെ,

വായുടെയും കപ്പിലേക്കുമുള്ള

യാത്രയില്‍ ഓര്‍ത്തതിത്ര മാത്രം,

കുഞ്ഞിലകളെ?

നുള്ളിയെടുത്തപ്പോള്‍

നൊന്തുവല്ലേ നിങ്ങള്‍ക്ക്?

എന്നാണ്?

മൂപ്പ് നോക്കി നോക്കി ഇരുന്നു,

കണ്ണ് പെടാതിരിക്കാന്‍

കാക്കതൂവലും

കോര്‍ത്തുവെച്ചു,

നോട്ടം പിഴച്ചത്

പിന്നാംപുറത്തോരു

അനക്കം കേട്ടപ്പോളാണ്.

ഭീമന്‍ ചിറകു വിരിച്ചു

ഊര്‍ന്നിറങ്ങി

റാഞ്ചിയെടുത്ത്,

കൂര്‍ത്ത കൊക്ക് കൊണ്ട്

അടര്‍ത്തി വിഴുങ്ങുന്നത്

കണ്ടപ്പോള്‍

ചെറു ചിരിയോടെ ഓര്‍ത്തു,

എന്നാണ് ഞാന്‍ എന്‍റെ

സ്വപ്നങ്ങള്‍ മുറ്റത്ത്‌ കണ്ണീരു

പുരട്ടി ഉണങ്ങാന്‍ ഇട്ടത് ?